Tracy Pollan, gruaja e aktorit Michael J. Fox, zbuloi se si çifti mbetet pozitiv pavarësisht betejës së tij me sëmundjen e Parkinsonit dhe çfarë i bën ata të lumtur çdo ditë.

Pollan mbështeti Fox në galën bamirëse të fondacionit të tij në Nju Jork të shtunën, ku ajo foli për revistën People rreth mënyrës se si po përballen me sëmundjen e tij.

“Mendoj se duhet të ecësh ditë pas dite. Duhet të shikosh atë që ke përpara dhe të qëndrosh në moment, dhe nëse ai moment është i duhuri, je aty”, tha Pollan.

Ajo shtoi se ajo dhe Fox, të cilët janë të martuar që nga viti 1988, kanë shije krejtësisht të ndryshme për librat dhe atë që shikojnë. Megjithatë, të dy gjithmonë shijojnë një vakt të mirë, kështu që janë vaktet së bashku ato që i bëjnë të lumtur çdo ditë.

Galaja “Një gjë qesharake ndodhi gjatë rrugës për të kuruar sëmundjen e Parkinsonit” u mbajt për herë të 26-të në hotelin Waldorf Astoria. Paratë e mbledhura shkojnë për kërkimin mbi sëmundjen e Parkinsonit dhe kërkimin e një kure. Prezantuesi i mbrëmjes ishte Denis Leary, performuan John Mayer dhe Brad Paisley, ndërsa komedianët Josh Johnson dhe Tom Papa argëtuan audiencën.

Pollan theksoi se gala feston punën e fondacionit dhe të gjithë atyre që kanë bashkëpunuar me të për më shumë se 20 vjet, dhe se paratë e mbledhura shkojnë direkt për shkencëtarët.

“Po shohim vërtet shumë përparim,” tha ajo.

Fox u diagnostikua me sëmundjen e Parkinsonit në vitin 1991 dhe themeloi fondacionin në vitin 2000. /Telegrafi/