Google po përgatitet të sjellë disa përmirësime në funksionin e diktimit me zë Rambler, të mundësuar nga inteligjenca artificiale në tastierën Gboard.

Ky funksion, i cili aktualisht është i disponueshëm vetëm në telefonat Pixel, e lehtëson shkrimin përmes zërit duke hequr pauzat dhe fjalët e panevojshme, transmeton Telegrafi.

Megjithatë, deri më tani, Rambler nuk ka mundur të mësojë fjalët që përdoruesit korrigjojnë ose shprehjet që përdorin në mënyrë të personalizuar.

Sipas analizës së versionit beta 18.6.3.10 të Gboard nga Android Authority, Google po punon për një veçori të re që do t’i mundësojë Rambler-it të krijojë një fjalor personal dhe të përshtatet me përdoruesin me kalimin e kohës.

Një nga opsionet e reja do të lejojë ruajtjen e fjalëve të korrigjuara, ndërsa një tjetër do t’i japë inteligjencës artificiale qasje te kontaktet, në mënyrë që të identifikojë dhe të shkruajë saktë emrat gjatë diktimit.

Përdoruesit do të mund të shtojnë edhe manualisht fjalë në fjalorin personal dhe të shohin listën e plotë përmes cilësimeve të Gboard. Madje, do të jetë i mundur edhe eksportimi i kësaj liste për ta ndarë me të tjerët.

Ende nuk dihet se kur Google do t’i bëjë të disponueshme këto risi. Megjithatë, zhvillimi i tyre duket se po përparon. Android Authority kishte vërejtur shenjat e para të përmirësimit të Rambler-it që në gusht, ndërsa versioni më i fundit beta zbulon disa funksione që synojnë ta bëjnë diktimin me zë më personal dhe më të saktë. /Telegrafi/