Agjencia e Ushqimit dhe Veterinarisë (AUV) ka lejuar përpunimin termik të një ngarkese prej 21 mijë kilogramësh mish pule të importuar nga kompania “Meka”, tek e cila është detektuar prania e bakterit Salmonella.
Vendimi për lejimin e trajtimit termik është marrë pasi ngarkesës i kishte skaduar afati i përdorimit, ndërsa inspektori kufitar fillimisht kishte refuzuar hyrjen e mallit në Kosovë.
Siç ka raportuar portali Veriu.info, ngarkesa e importuar nga Brazili ishte ndaluar në pikën kufitare pasi analizat laboratorike konfirmuan praninë e bakterit Salmonella Enterprise.
Ndonëse udhëzimet fillestare administrative parashikojnë kthimin mbrapsht ose asgjësimin e produktit të kontaminuar, rasti është trajtuar përmes procedurave alternative të lejuara me rregullore të veçanta të sigurisë ushqimore.
Gjendja u ndërlikua më tej pasi gjatë kohës sa ngarkesa qëndronte nën masat e bllokimit dhe procedurave administrative, produktit i skadoi afati i ruajtjes.
Pavarësisht refuzimit fillestar nga inspektori i terrenit për hyrjen e këtij produkti në tregun e konsumit të drejtpërdrejtë, AUV-ja ka nxjerrë vendim që lejon përpunimin termik të mishit — një procedurë teknologjike që shkatërron bakterin e salmonelës me kusht që produkti të përdoret vetëm si lëndë e parë për përpunim industrial.
Nga Agjencia e Ushqimit dhe Veterinarisë tregojnë se vendimi është bazuar në normativat në fuqi që lejon trajtimin termik të mishit të kontaminuar në kushte të kontrolluara industriale, duke garantuar se produkti final nuk përbën rrezik për shëndetin publik.
Në anën tjetër, mbetet e hapur çështja e procedimit të produktit me afat të skaduar përgjatë procesit të trajtimit.
Kompania “Meka” dhe AUV-ja po vazhdojnë procedurat e monitorimit të këtij stoku, derisa autoritetet kompetente nuk kanë njoftuar për ndonjë shkelje direkte që do të rrezikonte konsumatorin në tregun e hapur.
Burimi: Insajderi
