Një situatë dramatike po mbërthen Libanin, ku më shumë se një milion banorë po përballen me pasiguri të rëndë ushqimore dhe mungesë të mjeteve elementare për jetesë. Sipas parashikimeve, ky numër pritet të rritet edhe më tej duke arritur në 1,15 milionë deri në mesin e vitit 2027 – shifër kjo që përfaqëson pothuajse një të katërtën e gjithë popullsisë së vendit.
Vendi ndodhet nën presionin e dyfishtë të luftimeve të njëpasnjëshme dhe një krize të thellë ekonomike që po zgjat prej më shumë se shtatë vitesh.
Mundësitë për punësim në vend mbeten mjaft të kufizuara, kursimet e familjeve janë shteruar tërësisht dhe niveli i borxheve po vazhdon të rritet me ritme shqetësuese. Paralelisht me këtë, ngritja e vazhdueshme e çmimeve të ushqimeve, karburanteve dhe produkteve tjera esenciale ka rënduar pamasë buxhetet e familjeve libaneze.
Gjendja vlerësohet veçanërisht kritike dhe kërkon ndërhyrje të menjëhershme në zonat e prekura nga konflikti në jug të vendit, si dhe në rajonet e varfra veriore dhe lindore.
Dëmet financiare nga luftërat që nga tetori i vitit 2023 llogariten të jenë rreth 27 miliardë dollarë. Konflikti i fundit i marsit detyroi mbi një milion banorë të braktisnin shtëpitë e tyre, ndërsa me rënien e intensitetit të dhunës në qershor, numri i të zhvendosurve ka rënë në rreth 300 mijë. Gjithë kjo pasiguri vjen në një kohë kur Libani, i përfshirë nga kolapsi ekonomik që nga viti 2019, ende nuk ka arritur të zbatojë reformat e nevojshme strukturore për të zhbllokuar paketat e ndihmës financiare ndërkombëtare.
Sinjali – aty ku e vërteta flet para lajmit!
Burimi: Sinjali
