{"id":3210,"date":"2026-05-10T15:45:45","date_gmt":"2026-05-10T13:45:45","guid":{"rendered":"https:\/\/momenti.info\/index.php\/2026\/05\/10\/kushtet-e-veshtira-te-punes-pagat-e-uleta-e-sigurimi-shendetesor-sfidat-kryesore-te-policise-se-kosoves\/"},"modified":"2026-05-10T15:45:45","modified_gmt":"2026-05-10T13:45:45","slug":"kushtet-e-veshtira-te-punes-pagat-e-uleta-e-sigurimi-shendetesor-sfidat-kryesore-te-policise-se-kosoves","status":"publish","type":"post","link":"https:\/\/momenti.info\/index.php\/2026\/05\/10\/kushtet-e-veshtira-te-punes-pagat-e-uleta-e-sigurimi-shendetesor-sfidat-kryesore-te-policise-se-kosoves\/","title":{"rendered":"Kushtet e v\u00ebshtira t\u00eb pun\u00ebs, pagat e ul\u00ebta e sigurimi sh\u00ebndet\u00ebsor – sfidat kryesore t\u00eb Policis\u00eb s\u00eb Kosov\u00ebs"},"content":{"rendered":"
\n

Pagat e ul\u00ebta, mungesa e pajisjeve bazike dhe kushtet e v\u00ebshtira t\u00eb pun\u00ebs po vazhdojn\u00eb t\u00eb jen\u00eb sfid\u00eb p\u00ebr zyrtar\u00ebt policor\u00eb n\u00eb Kosov\u00eb, nd\u00ebrsa dor\u00ebheqjet nga Policia e Kosov\u00ebs po ndodhin edhe p\u00ebr shkak t\u00eb pak\u00ebnaq\u00ebsive me trajtimin institucional.<\/p>\n

Sindikata e Policis\u00eb s\u00eb Kosov\u00ebs dhe ish-pjes\u00ebtar\u00eb t\u00eb Policis\u00eb kan\u00eb ngritur shqet\u00ebsime p\u00ebr kushtet e pun\u00ebs, munges\u00ebn e pajisjeve dhe pagat q\u00eb i konsiderojn\u00eb t\u00eb pamjaftueshme p\u00ebr nivelin e rrezikshm\u00ebris\u00eb me t\u00eb cil\u00ebn p\u00ebrballen zyrtar\u00ebt policor\u00eb.<\/p>\n\n

Ish-koloneli i Policis\u00eb s\u00eb Kosov\u00ebs, Refki Morina, tha p\u00ebr Ekonomia Online, se puna e polic\u00ebve \u00ebsht\u00eb vazhdimisht e rrezikshme dhe p\u00ebr k\u00ebt\u00eb arsye ata duhet t\u00eb ken\u00eb paga m\u00eb dinjitoze.<\/p>\n

\u201cDuke e ditur rolin e institucioneve t\u00eb siguris\u00eb, Policis\u00eb s\u00eb Kosov\u00ebs, q\u00eb e luan n\u00eb mbrojtjen e rendit dhe t\u00eb qet\u00ebsis\u00eb publike, un\u00eb mendoj se pagat duhet t\u00eb jen\u00eb m\u00eb dinjitoze, do t\u00eb thot\u00eb m\u00eb t\u00eb mira, pasi q\u00eb vazhdimisht jan\u00eb n\u00eb rrezikshm\u00ebri. Puna e tyre 24 or\u00eb \u00ebsht\u00eb e rrezikshme, prandaj nj\u00ebsitet e posa\u00e7me, konkrete e tjera duhet t\u00eb ken\u00eb paga t\u00eb dinjitetshme, n\u00eb m\u00ebnyr\u00eb q\u00eb ata t\u00eb mund t\u00eb ekzistojn\u00eb dhe t\u2019i mbajn\u00eb familjet e tyre. Prandaj, nj\u00eb polici e cila nuk ka paga t\u00eb dinjitetshme, profesionalizmi, edhe pse profesional, mund t\u2019i bie profesionalizmi i tyre, p\u00ebr shkak se, do t\u00eb thot\u00eb, ata jan\u00eb t\u00eb detyruar me mbajt\u00eb familjet, f\u00ebmij\u00ebt e tyre dhe n\u00eb k\u00ebt\u00eb m\u00ebnyr\u00eb, do t\u00eb thot\u00eb, varen krejt prej pagave, prej t\u00eb ardhurave”, tha ai.<\/p>\n

Morina shton se shteti duhet t\u00eb investoj\u00eb m\u00eb shum\u00eb n\u00eb paga, t\u00eb investoj\u00eb n\u00eb rrezikshm\u00ebrin\u00eb e pjes\u00ebtar\u00ebve t\u00eb policis\u00eb, sidomos nj\u00ebsive p\u00ebrkat\u00ebse t\u00eb operacioneve, nj\u00ebsive t\u00eb krimeve t\u00eb r\u00ebnda, krimeve ekonomike, pastaj drog\u00ebs, trafikimit t\u00eb qenieve njer\u00ebzore e tjera.<\/p>\n

“Do t\u00eb thot\u00eb n\u00eb nj\u00ebsitet q\u00eb kan\u00eb nj\u00eb rrezikshm\u00ebri m\u00eb t\u00eb madhe n\u00eb aspektin e pun\u00ebs, p\u00ebr arsye se ata ballafaqohen \u00e7do her\u00eb me rrezikshm\u00ebri t\u00eb tilla dhe shteti duhet t\u00eb investoj\u00eb m\u00eb shum\u00eb, do t\u00eb thot\u00eb, te zyrtar\u00ebt policor\u00eb, n\u00eb m\u00ebnyr\u00eb q\u00eb t\u00eb ngriten edhe n\u00eb aspektin profesional, edhe moral, edhe njer\u00ebzor, n\u00eb m\u00ebnyr\u00eb q\u00eb ata t\u00eb ken\u00eb vullnet q\u00eb t\u00eb shkojn\u00eb n\u00eb pun\u00eb dhe ta kryejn\u00eb detyr\u00ebn e tyre sipas rregullativ\u00ebs dhe ligjit mbi policin\u00eb\u201d, tha Morina.<\/p>\n

Ai tha se Policia e Kosov\u00ebs vazhdon t\u00eb p\u00ebrballet me munges\u00eb t\u00eb logjistik\u00ebs dhe pajisjeve elementare p\u00ebr pun\u00eb.<\/p>\n

\u201cVazhdimisht kemi pasur probleme me logjistik\u00eb, prandaj nj\u00eb polici profesionale, e aft\u00eb p\u00ebr me mbrojt\u00eb rendin dhe qet\u00ebsin\u00eb publike, duhet t\u00eb ket\u00eb edhe pajisje teknike dhe teknologjike t\u00eb tyre. P\u00ebr shembull, n\u00eb disa rajone policore t\u00eb Kosov\u00ebs mungojn\u00eb automjetet, n\u00eb disa vende mungojn\u00eb veshmbathjet, gj\u00ebrat m\u00eb elementare me t\u00eb cilat nj\u00eb polic duhet t\u00eb pajiset p\u00ebr me kry pun\u00ebn dhe detyrat e tyre. Gjithashtu, te nj\u00ebsitet e caktuara, t\u00eb cilat 24 or\u00eb jan\u00eb online n\u00eb pun\u00eb p\u00ebr veprime t\u00eb caktuara, ata duhet ta ken\u00eb edhe ushqimin nga institucioni, do t\u00eb thot\u00eb gratis, p\u00ebr arsye se ushqimi dhe veshmbathja e mir\u00eb i mban polic\u00ebt q\u00eb ata t\u00eb jen\u00eb n\u00eb detyra m\u00eb efektiv\u00eb, m\u00eb t\u00eb nd\u00ebrgjegjsh\u00ebm, m\u00eb t\u00eb kujdessh\u00ebm e t\u00eb tjera”, shtoi Morina.<\/p>\n

Ish-koloneli theksoi de prandaj kemi mungesa t\u00eb tilla dhe mendon q\u00eb prokurimi brenda p\u00ebr brenda policis\u00eb edhe menaxhmenti i policis\u00eb duhet t\u00eb b\u00ebjn\u00eb \u00e7mos q\u00eb k\u00ebto gj\u00ebra, n\u00eb aspektin teknik dhe teknologjik, t\u00eb rregullohen. <\/p>\n

“P\u00ebr shembull, kemi munges\u00eb edhe t\u00eb kompjuter\u00ebve, kemi munges\u00eb t\u00eb fotokopjeve e tjera, t\u00eb cilat shum\u00eb her\u00eb polic\u00ebt jan\u00eb detyruar t\u2019i kryejn\u00eb detyrat me parat\u00eb e tyre, t\u00eb fotokopjojn\u00eb an\u00ebn zyrtare t\u00eb dokumenteve jasht\u00eb stacionit policor, q\u00eb \u00ebsht\u00eb e ndaluar me ligj. Prandaj, p\u00ebr me i ndal\u00eb k\u00ebto veprime jasht\u00ebligjore, p\u00ebr mos me ble pjes\u00eb t\u00eb uniform\u00ebs n\u00eb n\u00ebntregje, duhet q\u00eb institucioni, menaxhmenti i brendsh\u00ebm i Policis\u00eb s\u00eb Kosov\u00ebs, t\u00eb kujdeset n\u00eb m\u00ebnyr\u00eb q\u00eb teknika dhe teknologjia e tyre t\u00eb jet\u00eb n\u00eb nivelin e duhur, p\u00ebr arsye se ata patrullojn\u00eb 24 or\u00eb non-stop dhe n\u00ebse vetura nuk \u00ebsht\u00eb n\u00eb rregull, n\u00ebse nuk kan\u00eb vetur\u00eb, at\u00ebher\u00eb do t\u00eb thot\u00eb edhe shpejt\u00ebsia e daljes n\u00eb vendngjarje, konstatimi i rasteve t\u00eb ndryshme dhe thirrjeve t\u00eb qytetar\u00ebve mund t\u00eb vonohen\u201d, tha Morina.<\/p>\n

Sipas tij, dor\u00ebheqjet nga Policia e Kosov\u00ebs po ndodhin edhe si pasoj\u00eb e pak\u00ebnaq\u00ebsive me pagat dhe gradimet.<\/p>\n

\u201cFatkeq\u00ebsisht ka dor\u00ebheqje t\u00eb zyrtar\u00ebve policor\u00eb, p\u00ebr shkak t\u00eb pagave t\u00eb pamjaftueshme, pastaj p\u00ebr shkak t\u00eb moskujdesit sa duhet ndaj zyrtar\u00ebve policor\u00eb n\u00eb kryerjen e detyrave t\u00eb tyre zyrtare, n\u00eb gradimet e tyre t\u00eb brendshme, t\u00eb cilat gradime n\u00eb pozicionet e tyre e tjera shpeshher\u00eb ata i demoralizojn\u00eb dhe p\u00ebr shkak t\u00eb demoralizimeve t\u00eb tilla jan\u00eb t\u00eb detyruar ta l\u00ebn\u00eb Policin\u00eb e Kosov\u00ebs\u201d, tha Morina.<\/p>\n

Kurse, kryetari i Sindikat\u00ebs s\u00eb Policis\u00eb s\u00eb Kosov\u00ebs, Avdi Hoti, n\u00eb nj\u00eb p\u00ebrgjigje me shkrim p\u00ebr Ekonomia Online, tha se mungesa e sigurimit sh\u00ebndet\u00ebsor dhe jet\u00ebsor mbetet nj\u00eb nga shqet\u00ebsimet kryesore t\u00eb polic\u00ebve.<\/p>\n

\u201cKushtet e pun\u00ebs dhe mir\u00ebqenia e polic\u00ebve, mungesa e sigurimit sh\u00ebndet\u00ebsor dhe jet\u00ebsor p\u00ebr zyrtar\u00ebt policor\u00eb, \u00ebsht\u00eb nj\u00eb nga sfidat dhe shqet\u00ebsimet kryesore. Shtesat p\u00ebr rrezikshm\u00ebri konsiderohen t\u00eb pamjaftueshme krahasuar me rrezikun e pun\u00ebs. Puna n\u00eb nd\u00ebrrimet e nat\u00ebs ose kujdestaria nuk paguhen sa duhet. Kushtet fizike n\u00eb terren, mungesa e infrastruktur\u00ebs bazike n\u00eb disa pika\u201d, tha ai.<\/p>\n

Ai tha se Policia e Kosov\u00ebs vazhdon t\u00eb ket\u00eb munges\u00eb t\u00eb mjeteve operative dhe pajisjeve moderne.<\/p>\n

\u201cKa mungesa n\u00eb mjete operative, si vetura, pajisje t\u00eb ndryshme mbrojt\u00ebse dhe teknologji moderne, edhe munges\u00eb t\u00eb pajisjeve m\u00eb t\u00eb avancuara. Dor\u00ebheqjet e polic\u00ebve n\u00eb periudha t\u00eb ndryshme kan\u00eb krijuar boshll\u00ebk n\u00eb Policin\u00eb e Kosov\u00ebs, por kan\u00eb qen\u00eb p\u00ebr arsye t\u00eb ndryshme k\u00ebto dor\u00ebheqje, jo vet\u00ebm p\u00ebr arsye t\u00eb pagave, por edhe p\u00ebr arsye se zyrtar\u00ebt policor\u00eb kan\u00eb siguruar vende m\u00eb t\u00eb mira t\u00eb pun\u00ebs dhe e kan\u00eb gjetur veten m\u00eb mir\u00eb jasht\u00eb Policis\u00eb s\u00eb Kosov\u00ebs\u201d, tha Hoti.<\/p>\n

Ai shtoi se Sindikata e Policis\u00eb vazhdon t\u00eb k\u00ebrkoj\u00eb miratimin e ligjit p\u00ebr pensionimin e polic\u00ebve n\u00eb mosh\u00ebn 55-vje\u00e7are.<\/p>\n

\u201cSa i p\u00ebrket ligjit p\u00ebr pensionimin e Policis\u00eb n\u00eb mosh\u00ebn 55 vje\u00e7, Sindikata e Policis\u00eb s\u00eb Kosov\u00ebs gjithmon\u00eb ka insistuar q\u00eb ky ligj t\u00eb b\u00ebhet sa m\u00eb shpejt dhe t\u00eb hyj\u00eb n\u00eb fuqi menj\u00ebher\u00eb, dhe t\u00eb jet\u00eb sikurse ligji i FSK-s\u00eb ose i ngjash\u00ebm me ligjin e FSK-s\u00eb, por deri m\u00eb tani nuk \u00ebsht\u00eb n\u00eb fuqi ky ligj, edhe pse \u00ebsht\u00eb i domosdosh\u00ebm p\u00ebr Policin\u00eb e Kosov\u00ebs\u201d, tha ai.<\/p>\n

Hoti foli edhe p\u00ebr munges\u00ebn e uniformave, duke faj\u00ebsuar proceset e prokurimit dhe anulimin e tender\u00ebve.<\/p>\n

\u201cUniformat n\u00eb Policin\u00eb e Kosov\u00ebs jan\u00eb t\u00eb mang\u00ebta dhe qysh nga viti 2021 Policia e Kosov\u00ebs ka pasur sfida n\u00eb k\u00ebt\u00eb aspekt, edhe pse gjithmon\u00eb ka pasur angazhim p\u00ebr sigurimin e uniformave, por problem ka qen\u00eb Organi Shqyrtues i Prokurimit, q\u00eb i ka anuluar tender\u00ebt q\u00eb jan\u00eb shpallur fitues, ku tani s\u00eb fundi Policia e Kosov\u00ebs n\u00eb gjykatat vendore, si n\u00eb at\u00eb Themelore, i ka fituar k\u00ebto l\u00ebnd\u00eb dhe po ashtu l\u00ebnda p\u00ebr uniforma \u00ebsht\u00eb fituar edhe n\u00eb Gjykat\u00ebn e Apelit dhe shum\u00eb shpejt Policia e Kosov\u00ebs do t\u00eb pajiset me uniforma t\u00eb reja\u201d, tha ai.\/EO\/<\/p>\n