Kalimi nga produktet e qumështit te alternativat me bazë bimore mund të shkaktojë mungesë të disa lëndëve ushqyese të rëndësishme për organizmin. Kështu paralajmëron një studim i ri, i publikuar nga gazeta britanike The Guardian.
Sipas studiuesve, zëvendësimi i qumështit, djathit dhe kosit me produkte me bazë soje, bajamesh apo tërshëre mund të ulë marrjen e jodit, kalciumit, vitaminës B2 dhe vitaminës B12, veçanërisht në rastet kur këto alternativa nuk janë të pasuruara me vitamina dhe minerale.
Shqetësimi kryesor lidhet me jodin, një mineral thelbësor për funksionimin e gjëndrës tiroide, rregullimin e metabolizmit dhe zhvillimin e trurit. Sipas studiuesve, më shumë se gjysma e vajzave adoleshente në Britani nuk e marrin sasinë e nevojshme të këtij minerali.
Studimi ka treguar se zëvendësimi i 20 deri në 30 për qind të produkteve të qumështit me alternativa bimore mund ta rrisë përqindjen e vajzave adoleshente me marrje të pamjaftueshme të jodit nga 54 në 65 për qind. Te gratë e moshës 19 deri në 49 vjeç, kjo përqindje mund të rritet nga 32 në 42 për qind.
“Dihet se mungesa e jodit mund të ketë pasoja për shëndetin dhe për këtë arsye duam të rrisim ndërgjegjësimin për këtë problem”, ka thënë doktoresha Sarah Bath, profesoreshë e asociuar në Universitetin e Surreyt.
Ajo ka theksuar se vajzat e reja dhe gratë në moshë riprodhuese janë grupet më të rrezikuara, pasi jodi ka rëndësi të veçantë gjatë kësaj periudhe të jetës.
Për të analizuar përbërjen ushqyese të këtyre produkteve, studiuesit shqyrtuan 146 lloje qumështi bimor, 76 lloje kosi dhe 67 lloje djathi pa përbërës shtazorë, të cilat tregtohen në Britani.
Rezultatet treguan se 61 për qind e produkteve përmbanin kalcium të shtuar, ndërsa 46 për qind ishin të pasuruara me vitaminë B12. Megjithatë, vetëm 19 për qind përmbanin vitaminë B2 të shtuar dhe vetëm 12 për qind ishin të pasuruara me jod.
Sipas modelit të përdorur nga studiuesit, zëvendësimi i një të tretës së produkteve të qumështit me alternativa bimore mund ta ulë marrjen e jodit nga 9 deri në 21 për qind. Nëse të gjitha produktet e qumështit zëvendësohen me alternativa bimore, marrja e pamjaftueshme e jodit mund të prekë deri në 80 për qind të vajzave adoleshente.
Studiuesit theksojnë se pasurimi i produkteve bimore me jod do të ndihmonte në parandalimin e këtij problemi.
Megjithatë, kjo nuk nënkupton se të gjithë personat që konsumojnë produkte me bazë bimore do të përballen me mungesa ushqyese. Dietologia Nichola Ludlam-Raine, përfaqësuese e Shoqatës Britanike të Dietologëve, ka shpjeguar se kjo varet nga mënyra e përgjithshme e të ushqyerit.
“Për këdo që zgjedh qumështin me bazë bimore, do të rekomandoja të kontrollojë etiketën dhe të zgjedhë produkte të pasuruara me jod”, ka këshilluar ajo.
Sipas dietologes, qumështet bimore organike zakonisht nuk pasurohen me vitamina dhe minerale shtesë, prandaj mund të mos sigurojnë sasinë e nevojshme të jodit.
Ndërkohë, peshqit e bardhë, si merluci, vezët dhe produktet e qumështit, për personat që i konsumojnë, përbëjnë burime të tjera të këtij minerali.
Ajo ka paralajmëruar gjithashtu se suplementet me alga deti nuk duhet të përdoren si burim i sigurt i jodit, pasi përmbajtja e këtij minerali mund të ndryshojë ndjeshëm dhe, në disa raste, të jetë e tepërt.
Sinjali – aty ku e vërteta flet para lajmit!
Burimi: Sinjali
